Alarive Koukouwouj Karant an refleksyon kritik

Nan liv sa a, mwen respekte òtograf Akademi Kreyòl Ayisyen an rekòmande nan dezyèm rezolisyon li te pibliye nan mwa septanm 2023 a. Sepandan, nan sitasyon dirèk yo, mwen respekte òtograf tèks orijinal yo te genyen nan moman otè tèks sa yo te pibliye yo a. Piplis toujou, mwen ap atire atansyon tout moun sou Pingga Sosyete Koukouy konsènan fason AKA ta dwe amilyore pwopozisyon li yo sou òtograf la. Nan divès seksyon ki parèt anndan liv la, nou va remake tout aksyon mwen antreprann pou mwen demontre tout moun, lanng kreyòl la pa gen limit. Limit li, se limit moun ki ap sèvi avèk li yo. Poudayè, nanpwen okenn lanng ki rete epi ki grandi tèt li oswa devlope tèt li san aksyon dirèk sitwayen ki ap sèvi avèk li yo. Anfèt, si pou lanng kreyòl la rive branche nan tout espas lakonesans, dwe genyen yon revèy konsyans total kapital nan mitan moun ki genyen divès konpetans epi nan divès branch. Yotout dwe bay tèt yo wòl mèt mo ak lide pou yo leve tout defi ki vin frape pòt sosyete nou an sou plan lenguistik. Se noutout, kòm mèt mo, ki genyen devwa pou nou fè lanng kreyòl sèvi nou bousòl nan divès aksyon nou ap antreprann. Se kalite ajisman kon sa, ki pral touye tout kalite laperèz ki anpeche nou mennen lanng kreyòl la nan dimansyon, kote li poko rive jounen jodi a. Alaverite, se kalite ajisman avangadis sa yo ki pral kraze prejije, fè enjistis sou baz lanng nou pale a bat an retrèt, epi reveye fyète moun ki genyen lanng kreyòl la kòm sèl grenn resous pou yo kominike anndan peyi a.